本來想養成寫日記/周記/月記習慣至寫blog的,可惜太懶惰,成日無更新 orz
施丹不愧係列治戈夫既繼承人,復活的丹叔太強了.
同呢季半比,佢呢場好肯同人撞,好肯過人(雖然都俾人偷甩幾次),呢樣係近年少見的.俾佢休息下果然係唔同d.
贏4-2,佢1 assist, 3 goals,老還老,始終係球王,肯搏既始終都係萬夫莫敵.至少,西維爾唔係魚腩.
丹叔勁之餘,留意到幾樣野:
1.好耐無踢過波既火星人,上果場踢左半場後備.呢場直接打正選,應該同最聯(註1)bid佢有關.可惜太耐無踢波,走位默契差,傳波成日miss,攔截唔準,遠射射到就快變throw in,得番盤扭好少少.到下半場至開始入局,可惜為時已晚,被換出了.
2.迫含頻頻落底,會嘗試扭人,有一鑊仲通左人坑渠過埋對手,加上往績(如放甩雲邦賀斯),我開始誤會佢係森巴式技術型球員了.老實講,近年我對佢評價極度正面.
3.羅賓奴頗乖,成日標人地守門員,唔貪功,唔獨食,成日傳波,其實我覺得佢有時可以試下獨少少扭入去的.雖然黎左咁耐表現都唔算太好,但聽教聽話兼有質素,極期待成長後既佢.
4.施仙奴真係無買錯人,係一個速度快,肯搏肯做既翼衛,同技術型既迫含打小組滲入效果竟然比想像中更好?太神祕了
5.該場做隊長既副隊長古迪. 1 assist 1 goal. 禁區頂背向龍門,接應隊友傳送時唔控直接一腳後踭assist俾施丹果球靚到天下無敵.朋友A睇新聞highlight死口話佢符碌,睇live的我當時覺得佢係特登的.背向龍門,仲要唔控第一時間後踭傳到施丹咁空,我覺得無乜可能符碌?如果係符碌,佢原本唔通諗住掘番去自己半場咩大佬,背龍架,又禁區頂,獨食d自己控定射埋都得啦.賽後有統計話佢該場傳61次,有60次成功.就算個統計唔準,都相差唔遠了.
6.偽巴迪高係一個騙局.該場埋門五六次,無次射得入.早排頂施丹踢前腰,扭唔係勁,傳送又無默契,射又唔準.我唔知佢係狀態差,太緊張定仲未融入到球隊,但踢左半季仲係咁既表現,強差人意了.佢埋門既表現點可以想像到佢上季拎西甲神射手第二位?
7.卡路士明顯退步了,開波後係咁敗壞機會,去到25分鐘至入局,不過入局後表現唔錯,同施丹打快推組合(註2).可能年紀大,最後被換出,但換入既竟然係合成獸魯爾包禾(註3),勤力就勤力,但踢到劈屎咁,又敗壞機會,如果卡路士唔係因為無氣而咁換法既話唔該快d換教練啦大佬
8.留意一點,無左朗拿度既皇馬連續兩場大炒對手了,有吹水新聞傳最聯想要佢,真希望謊言變成事實啊...
註1:火星人同最聯乃某足版術語,請自行猜測謎底.
註2:傳統同常識上係施丹傳去空位,等卡路士去標粒生波屈速度,但該場卡路士亦有多次傳生粒波等施丹標,仲要標得贏 orz
註3.魯爾+包禾合體而成.前者受傷無落場,後者無傷連後備席都無份,消失的二人應該係去左合成做魯爾包禾了
沒有留言:
張貼留言